Bü kimp hêitsje moehs vanaof
van bü kimp hèè ên hêt
Hit ên hüt van haeite
van haage hilt ên haat
Maerge wèèrdt ’t hèie
ich bèn althiehd hèij
’n Haote baar hit knèppel
’n flètte wêi hit hêi
Joeng, dat Ziettendels
nee gemèèkelek
Wadden biesterêi
’t zwaeit staeit op m’n prêi
Raor ên rèèr ziehn raoier
de kruiker hèèt ai raod
E rèèdsje ès weer klêiner
’t ès raoje nao de maot
Èn t reet dao wünne èèndjes
mèt pluume gèèl ên roeid
Oppe rüt dao bolle trêmkes
ma ’n vinster ès ’n ruut
D’n ingel gaeit nao buuëve
d’n oennèt nao ’t vier
Wilste ieëver ’t waoter
pak dan mêr ’t vèèr
De lèste kimp van aachter
d’n ierste staeit van vèèr
En vier de loempe vaerke:
aachter drèi kimp veer
Blaor ên blèèr ên blaoier
aein ellêin ès blaod
Van laaipe krèiste blaore
van beer ’n dikke blaos
Fanfares koenne bluuëze
‘ne wind dèè althiehd bleest
Bluume koenne blêie
dat mik de vrallie blèi
De bèèr dèè hilt van biere
van beer hilt Baer de baoi
Het spêk dat maogste braoje
ên e lêpke ès ‘ne braoi
Mèt buurkes koenste baore
ma buure daeit de buur
‘ne Stèk van haot hit knèppel
ma van iehzer ès ’n baar
’n Kruiker zwuur gelaoje
vèèl lieëpels ènne laoi
Klokke koenne loeie
al ès de kèster laei
De lèi dèi lèèze beekskes
ên sjriehve obben lêi
‘ne Pot mèt lêkker pruume
’n snèè mèt gêt zjelêi
‘t Sjaop haa jieëk ên sjoerde
het kèimde van plezeer
‘t Mees opnuiw gesjuure
ma Sjarel voend gêin sjier
Goenk ènt sjop gêt sjaare
dao luug ze oppet sjaohp
Sjèèle Sjang kos sjèère
al waost gêt sjèèg ên sjèins
De aaner sjèèp dèi stoehne
te waachte ènne sjeer
Sjün bèijaein te sjuille
te kiekke nao ‘n sjoer
Bij sjèppe ên bij sjoehpe
nee sjieëtig ên gêt sjuiw
want alle sjèèp dèi loehpe
vollédig ènnet nuiw
Harie goenk gemaeinlek
nao Zjakkie de kwaffeur
Gèèn z’n haor gesnieën
e broske, nee te kaol
Sjêrpe sjier, e sjaerep maes
kèmme mèt ‘ne kamp
Het sjèèlde mêr ‘n haonepin
de sjaeigel loehp gêt sjaeif
Mèt stêkskes moeste stuuëke
e stèkske ès genoeg
E klaeid dat koenste stikke
Mèt gaore, naold ên stof
‘n Sjaerep maogste strikke
Mèt iehzers ên gêt wol
G’n loch, dan gaeiste stikke
Dus zuuk d’n loenge vol
‘nen Dinne buuk hit biehkske
dao mikt de klêinste maot
‘ne Buuk mèt zèstien laoge
ên boekke miktich kaod
De koens gêt stun te bieëke
vèèl waoter èn de bieëk
Ma ‘t boehk ès imgedraoge,
dèè bok kimp aech te laot
Pol de Pool dèè lèènde
tieëgen‘ne paol
De koens g’n aerte paole
de haan stiehf ènne maol
Het pèèrd dat sjèlt de pèèlkes
‘t hilt zü nee van kiehs
Dus stand dao nee te pritse
langem ‘ne piehl sesiehs
Joeng, dat Ziettendels
nee gemèèkelek
Wadden biesterêi
‘t zwaeit staeit op m’n prêi